tula-tulaan

yet another attempt to do poetry:

kalendaryo

miyerkules.
"umiiyak tayo para malaman
kung sino ang pupunas
ng mga luha natin." sinabi
mo ito sa akin.

martes.
umiyak ka at ang langit.
nag-unahan kayo ng mga ulap
sa pagpapapatak ng luha sa
pasimano ng bintana.
nanalo ang mga ulap.

lunes.
nakapaninibago. maalinsangan
gayong ubos na ang alimuom
sa aking katawan. napasingaw
nang lahat ng bagyong delubyo,
habang sinisigaw ng hangin ang pangalan mo.

linggo.

sabado. biyernes. huwebes.
walang pumunas sa mga luha ko.
natalo ko ang mga ulap, pero
sinong mag-aakalang magwawagi sila
sa iyo dahil sa hawak kong panyo
at hindi sa pasimano ng bintana
babagsak ang luha mo?

miyerkules.
hindi para sa akin ang mga katagang ito.
dahil hindi mahalaga kung sino
ang pupunas ng iyong mukha,
kung may pinaglalaanan ka na
nitong papahiring mga luha.