sa alaala ng unang taong minahal ko

ANG MANANAYAW

sa bawat
pag-igtad
ng iyong katawan

at pag-indayog
ng namimintig
mong mga laman

muling sumasaliw
ang buhay
na ritmo

ng unti-unting
pagkabali
ng bawat butong

hinahanap-hanap
ang mga yapos
at haplos mo.

habang lumiliyad
ang iyong
pagkatao

mapusyaw mong susuklian
ng sulyap
ang bawat titig ko.

at sa maikling
sayawan ng ating
mga mata,

o ng akin lamang ba?

isasayaw mo ako
sa tugtuging
bagaman wala sa tiyempo,

ay napaiigtad
at napaiindayog
ang darang na anino

ng puso ko.

-jnpt 05/25/05-